Os ydych chi'n cynllunio gwyliau gartref y flwyddyn nesaf, neu'n chwilio am ddihangfa am benwythnos dros y gaeaf, mae Sir Pen-y-bont ar Ogwr yn gyrchfan gyffrous drwy gydol y flwyddyn i bob math o anturiaethwr! Cyfuniad perffaith o natur, hanes, antur a bwyd a diod blasus! Beth am i ni weld pam y dylai Sir Pen-y-bont fod ar eich rhestr bwced chi ar gyfer teithiau difyr:
Bywyd Gwyllt Bendigedig
Gyda mannau awyr agored helaeth, mae cynefinoedd amrywiol Sir Pen-y-bont ar Ogwr mewn cefn gwlad, yn y mynyddoedd ac ar yr arfordir yn gartref i lawer o greaduriaid hardd - mawr a bach!
Rhyfeddodau hynafol
Yn drysorfa o dirnodau hanesyddol, a gyda threftadaeth ddiwydiannol gyfoethog, mae Sir Pen-y-bont ar Ogwr yn drysor i bawb sy'n hoff o hanes! Mae cyfle i archwilio adfeilion cestyll ac adeiladau hynafol, ac ymgolli mewn straeon o orffennol hanesyddol Sir Pen-y-bont ar Ogwr.
Bwyd a Diod Blasus
Byddwch yn barod i flasu coginio campus - o brydau Cymreig traddodiadol i fwyd rhyngwladol, drwy wyliau bwyd, marchnadoedd crefft, ac ystod eang o gaffis, bariau a bwytai lleol - mae'r bwyd sydd ar gael yn Sir Pen-y-bont ar Ogwr yn ardderchog!
Llwybrau Syfrdanol
Ar feic neu ar droed, mae digon o ddewis o lwybrau golygfaol i'w harchwilio yn Sir Pen-y-bont ar Ogwr - cyfle i grwydro drwy goetiroedd tawel, cerdded ar hyd yr arfordir garw, a dilyn llwybrau sy'n eich arwain drwy ein cymoedd hardd.
Tonnau epig
Os ydych chi'n mentro i'r tonnau am y tro cyntaf, yn perffeithio eich sgiliau neu'n chwilio am syrffio epig i'w fwynhau - mae Porthcawl yn llecyn poblogaidd yn y DU ar gyfer profiad syrffio gwefreiddiol!
Lleoedd Naturiol Hardd
Cyfle i ymweld â llecynnau naturiol heb eu difetha gyda'n parciau a'n gwarchodfeydd natur - y cefndir perffaith ar gyfer ymlacio ac ailgysylltu â byd natur. Darganfyddwch fwy am drysorau naturiol Sir Pen-y-bont ar Ogwr yma.
Siopa
Dewch i ddarganfod cofroddion a chynhyrchion unigryw gan grefftwyr mewn marchnadoedd lleol, chwiliwch am frandiau'r stryd fawr a bwtîc annibynnol yng nghanol ein trefi, neu bori drwy frandiau dylunwyr mawr yn Allfa Dylunwyr Pen-y-bont ar Ogwr.
Gwestai moethus
Cewch fwynhau encil wledig foethus, dianc i lan y môr neu lety bwtîc hyfryd gydag ystafelloedd clyd a chroeso cynnes. Y lle perffaith i ymlacio a chael seibiant braf. Edrychwch ar fwy o opsiynau llety yma.
Golff o'r safon uchaf
Gyda chyrsiau o safon byd a golygfeydd o safon byd hefyd, mae yma ddigon o ddewis o leoliadau golff gwych! Yn enwog am gyrsiau rhagorol gyda chefndir trawiadol, a lawntiau o safon pencampwriaeth - mae Sir Pen-y-bont ar Ogwr yn gyrchfan y mae'n rhaid ymweld â hi ar gyfer pawb sy'n feistr ar chwarae golff.
Machlud haul trawiadol
Beth am orffen eich diwrnod gyda machlud cyfareddol dros dirweddau prydferth Cymru. Os byddwch chi'n dewis mwynhau'r awyr liwgar o'n traethau ni neu o gopaon ein mynyddoedd aruthrol - bydd machlud haul Sir Pen-y-bont ar Ogwr yn siŵr o'ch gwefreiddio chi!
Creu eich rhesymau eich hun dros ymweld...
Mae Sir Pen-y-bont ar Ogwr yn hoff gyrchfan i bob math o deithwyr - os ydych chi'n chwilio am brofiad moethus, yn frwd am yr awyr agored, yn anturiaethwr, yn hoff o fwyd neu'n hoff o fyd natur! O brofi agosrwydd at fyd natur, teithiau cerdded golygfaol a gweithgareddau awyr agored gwefreiddiol, i fwynhau cynnyrch bwyd a diod gorau Cymru - cynlluniwch eich ymweliad am brofiad teithio bythgofiadwy!