Dilynwch lwybrau sy'n llawn harddwch naturiol! Gyda thirweddau gwyrdd hyfryd - mae Sir Pen-y-bont ar Ogwr yn lle gwych i fod yn agos at natur - ac mae un llecyn prydferth lleol newydd ailagor y drysau i'w gaffi a'i hanolfan ymwelwyr, sydd wedi'u lleoli mewn amgylchedd delfrydol a gwledig.
Gwarchodfa Natur Parc Slip
Ychydig filltiroedd o ganol tref Pen-y-bont ar Ogwr, ar hyd lonydd cefn gwlad deiliog ac ir, fe welwch chi Warchodfa Natur Parc Slip - paradwys i bobl sy'n hoff o fyd natur gyda 300 erw o dirweddau trawiadol - gan gynnig cyfleoedd unigryw i ymwelwyr archwilio cynefinoedd naturiol cyfoethog De Cymru. Mae'r warchodfa yn gartref i amrywiaeth eang o fywyd gwyllt, o weision y neidr a glöynnod byw i adar ysglyfaethus a cheirw. Mae'r dolydd blodau gwyllt, y cnydau âr, y porfeydd, y gwlybdiroedd a'r coetiroedd sy'n rhan o'r dirwedd yn meithrin miloedd o rywogaethau o blanhigion ac anifeiliaid.
Gallwch gerdded neu feicio am filltiroedd i archwilio'r llwybrau cylch llawn golygfeydd ym Mharc Slip, neu fwynhau taith gerdded fer o'r maes parcio i edrych allan o'r guddfan ar y gwlybdiroedd gogleddol, lle mae Gwartheg yr Ucheldir yn pori glannau llyn hardd. Os mai te a chacen gyda golygfa sydd fwyaf at eich dant - beth am amsugno tawelwch lleoliad y warchodfa o'r caffi a'r ganolfan ymwelwyr, sydd ag ardaloedd eistedd dan do ac awyr agored.
Mae cyfle i ddysgu am hanes mwyngloddio glo Parc Slip gyda'r llwybr treftadaeth, gan gamu yn ôl mewn amser i'r bedwaredd ganrif ar bymtheg pan oedd y tir yn gartref i Bwll Glo Parc Slip. Mae cerfluniau amrywiol ledled y warchodfa yn ein hatgoffa ni o orffennol diwydiannol y tir - gyda ffynnon goffa i gofio'r rhai a gollodd eu bywydau mewn trychineb lofaol fawr ar y safle ar 26ain Awst 1892. Fe welwch chi godau QR ar hyd y llwybr sy'n cysylltu â darnau sain a gwybodaeth o wefan Ymddiriedolaeth Natur De a Gorllewin Cymru.
Mae Parc Slip yn un o nifer o leoliadau yn Ne Cymru sy'n ffurfio Parc Rhanbarthol y Cymoedd (VRP), gyda Phyrth Darganfod yn cael eu hamlygu fel padiau lansio i dirwedd a threftadaeth stori'r Cymoedd. Mae Sir Pen-y-bont ar Ogwr yn gartref i ddau Borth Darganfod o'r VRP - Gwarchodfa Natur Parc Slip a Pharc Gwledig Bryngarw.
Parc Gwledig Bryngarw
Gyda mwy na 100 erw o barcdir i'w archwilio, mae Parc Gwledig Bryngarw yn lleoliad gwledig trawiadol arall yn Sir Pen-y-bont ar Ogwr lle gallwch ymgolli ym myd natur. Yn hawdd ei gyrraedd o draffordd yr M4, mae'r parc yn cynnig diwrnod allan gwych i deuluoedd sy'n hoff o'r awyr agored - gyda llwybrau coetir troellog a gerddi lliwgar i'w harchwilio, yn ogystal â chae chwarae antur, caffi ac ystafell ddarganfod lle gall plant bach ddysgu am y cynefinoedd niferus y mae'r parc yn eu cynnig i rywogaethau o blanhigion ac anifeiliaid.
Mae pyllau bywyd gwyllt y parc, y llyn addurnol a'r ardaloedd o goetir gwlyb yn llecynnau gwych i sylwi ar fywyd dyfrol fel brogaod, llyffantod, madfallod dŵr a physgod! Os oes angen cyngor arnoch chi ar arsylwi bywyd y pwll - mae Ymddiriedolaeth Ddiwylliannol Awen yn cynnal sesiynau Archwilio Pyllau drwy gydol y flwyddyn lle bydd Ceidwaid y Parc yn helpu plant i chwilio am greaduriaid tanddwr i ddysgu mwy amdanyn nhw a'u cynefinoedd.
Cyfle i fynd ar goll yn y goedwig (yn drosiadol!) wrth i chi ddarganfod amryw o rywogaethau brodorol o goed ym Mryngarw - gan gynnwys castanwydd pêr aeddfed, derw hynafol a ffawydd tal, gyda llawer ohonynt yn gannoedd o flynyddoedd oed! Ewch am dro yno yn y Gwanwyn a rhyfeddu at y clychau'r gog hardd sy'n garped ar lawr y coetir.
Yn ogystal â bod yn hafan i bobl sy'n hoff iawn o fyd natur, mae Bryngarw yn cynnal rhaglen o ddigwyddiadau cyffrous drwy gydol y flwyddyn, fel theatr awyr agored, Baddondai Gong, gweithgareddau i blant a gweithdai i oedolion.
Ac mae'r hwyl yn ddiddiwedd . . .
Yn ogystal â'r Pyrth Darganfod VRP, mae Sir Pen-y-bont ar Ogwr yn gartref i lawer o leoliadau syfrdanol eraill i fwynhau'r awyr agored...
I'r rhai sydd eisiau herio eu coesau gyda cherdded y bryniau, neu chwilio am lwybrau beicio heriol, mae Parc Calon Lân yng Nghwm Garw yn fan cychwyn gwych ar gyfer anturiaethau mynydd. Bydd cyfle i werthfawrogi golygfeydd y cymoedd wrth i chi deithio drwy goedwig wych sy'n ddelfrydol ar gyfer cerdded, beicio mynydd, neu ddim ond eistedd am sbel.
Yng Nghwm Llynfi, mae gan y llecyn natur lleol Ysbryd Coetir Llynfi, lwybrau golygfaol ar gyfer cerdded, rhedeg neu feicio, yn ogystal â llwybr gweithgareddau i gŵn ac amgylchedd hardd i'w harchwilio! Cadwch lygad am Geidwad y Pwll Glo, cerflun derw sy'n anrhydeddu treftadaeth ddiwydiannol gyfoethog Sir Pen-y-bont ar Ogwr.
I lawr ar yr arfordir mae dau gyrchfan unigryw ar gyfer pobl sy'n hoff o fyd natur - Gwarchodfa Natur Genedlaethol Cynffig a Gwarchodfa Natur Merthyr Mawr. Mae gan y ddwy warchodfa systemau twyni tywod helaeth sy'n ffinio â thraethau euraidd, heb eu difetha ac maent yn gartref i wahanol rywogaethau o anifeiliaid a phlanhigion. Yn swatio rhwng y ddwy warchodfa mae tref glan môr Porthcawl - lleoliad gwych arall i fwynhau byd natur, gyda chyfleoedd i archwilio bywyd y môr yn Academi Traeth Cymru, Rest Bay.
Mae mwy i'w rannu...
Mae Sir Pen-y-bont ar Ogwr yn cynnig cyfleoedd diddiwedd i archwilio a mwynhau'r awyr agored gwych. Os ydych chi'n chwilio am encil heddychlon neu antur yn llawn bwrlwm, mae rhywbeth at ddant pawb. Felly, paciwch eich esgidiau cerdded, a byddwch yn barod i brofi rhyfeddod trysorau naturiol Sir Pen-y-bont ar Ogwr!
O.N. Cofiwch dagio @visitbridgend os ydych chi'n rhannu manylion difyr eich ymweliad ar gyfryngau cymdeithasol!