Cyrchfan unigryw sy'n adnabyddus am dirweddau amrywiol, golff, chwaraeon dŵr, teithiau cerdded golygfaol, bwyd blasus, digwyddiadau cyffrous drwy gydol y flwyddyn a phrofiadau bythgofiadwy - mae angen i Sir Pen-y-bont ar Ogwr fod ar frig eich rhestr chi o lefydd mae'n rhaid ymweld â nhw yr haf yma! Gyda chymaint i'w weld a'i wneud, efallai yr hoffech chi aros ychydig bach i'w archwilio! Edrychwch ar y llety newydd ac amrywiol sy'n cynnig y lle aros perffaith ar gyfer eich seibiant nesaf...
Cyfle i ymgolli yn y gwyllt gyda glampio yng nghoedwig hudolus Merthyr Mawr
Am gyfnod cyfyngedig yn unig, bydd ymwelwyr yn cael cyfle y mis yma i ymlacio mewn amgylchedd naturiol hyfryd mewn encil lles dros dro ym Merthyr Mawr. Wedi'i ddatgan fel dihangfa o fywyd modern', mae This Must Be The Place yn cynnig lleoliad gwych i bobl sy'n hoff o fyd natur, gan wahodd gwesteion i safle gwersylla yng nghanol y coed lle byddwch chi'n ymlacio o dan y sêr mewn cymuned o bobl o'r un anian yn mwynhau seibiant braf. Mae'r coetir yn agor allan ar dwyni helaeth gyda golygfeydd o'r môr a llwybrau troellog yn arwain at draeth euraidd - perffaith ar gyfer mynd am dro ar godiad a machlud yr haul!
Cyfle i ymgolli mewn profiadau fel sawna coedwigoedd, ioga, a nofio yn y môr ar doriad gwawr ac ailgysylltu â ffrindiau a theulu yn yr encil rhyfeddol yma. Rhowch hwb i'ch lles drwy ymdrochi yn llonyddwch y goedwig, manteisio ar fuddion therapïau poeth ac oer a mwynhau golygfeydd y coetir wrth i chi gysylltu ag eraill o flaen tanau gwersylla cymunedol. Os ydi hyn i gyd yn swnio fel lle perffaith i chi adfywio - mae archebion yn cael eu derbyn nawr i gadw pebyll cloch neu safleoeddd gwersylla rhwng 14eg a 30ain Gorffennaf. Gydag amgylchedd mor unigryw i ddianc rhag y cyfan, mae This Must Be The Place yn brofiad na fyddwch byth yn ei anghofio!
Cyfle i fwynhau seibiant moethus yng Ngwesty a Sba Heronston sydd newydd gael ei adnewyddu
Bydd posib i chi gamu i mewn i fyd o geinder yng Ngwesty a Sba Best Western Heronston, gydag estheteg moethus yn syfrdanu gwesteion diolch i waith adnewyddu gwerth miliynau o bunnoedd yn ddiweddar. Gall gwesteion fwynhau addurniadau cain ac ystafelloedd rhyfeddol o eang, gan gynnig llety cyfforddus ar gyfer anturiaethau teuluol, seibiannau rhamantus neu deithio ar eich pen eich hun. Wedi'i leoli mewn llecyn gwledig, deiliog, ond dafliad carreg yn unig o ganol tref Pen-y-bont ar Ogwr - mae lleoliad hygyrch y gwesty yn ei wneud yn ddewis poblogaidd i ymwelwyr â'r ardal, ac mae hefyd mewn llecyn delfrydol i archwilio atyniadau lleol.
Cewch gyfle i fwynhau anturiaethau gerllaw yn nhwyni tywod eang Gwarchodfa Natur Genedlaethol Merthyr Mawr, neu archwilio hanes lleol yng Nghastell Ogwr a Chrochendy Ewenni gerllaw. Os yw'n well gennych chi ymlacio ac adfywio, mae gan y gwesty gyfleusterau gwych gyda phwll nofio, canolfan ffitrwydd a sba iechyd, yn ogystal â bwyty a bar i ymlacio ynddo. Gyda'i agosrwydd at Arfordir Treftadaeth Morgannwg, mae'r gwesty yn cynnig hoe gyda chyfuniad perffaith o ymlacio ac antur - gan roi i westeion holl fanteision gwesty mawr ond gyda naws glyd, gartrefol!
Profiad o fywyd fferm yn Tiny Cedar House
Os ydych chi'n chwilio am le i gyd i chi'ch hun mewn llecyn tawel, gwledig - gallai Tiny Cedar House fod yn gartref gwyliau perffaith i chi! Wedi'i wneud o goed cedrwydd ac ynn wedi'u malu ym melin lifio'r fferm, mae Tiny Cedar House yn ychwanegiad newydd at Fferm Tŷ Tanglwst, ac mae wedi'i grefftio â gofal i gynnig arhosiad glampio moethus i westeion ar y fferm laeth weithredol 120 o erwau, ychydig filltiroedd o arfordir hardd Sir Pen-y-bont ar Ogwr. Cyfle i dreulio amser pwysig gyda'ch anwyliaid, gyda digon o le i bedwar o bobl a'r holl gysuron cartref sydd arnoch eu hangen. Cyfle am brofiad glampio real gyda stôf goed a phwll tân awyr agored yn eich gardd gaeedig breifat a'ch ardal decin eich hun.
Gyda lleoliad mor arbennig - yn swatio yng nghefn gwlad ond heb fod yn rhy bell o'r arfordir - mae Tiny Cedar House yn hafan arbennig i'r rhai sydd eisiau seibiant oddi wrth brysurdeb bywyd bob dydd!
Deffro i sŵn y môr yng Ngwesty Seabank
Mae Gwesty Seabank yn olygfa berffaith i ryfeddu ati, mewn llecyn amlwg ar lan y môr hardd Porthcawl. Gyda gwaith adnewyddu diweddar wedi diweddaru addurn y lolfa ac yn rhoi gwedd newydd a ffres i'r dderbynfa, mae gwesty mwyaf Porthcawl yn cynnig dihangfa braf ar lan y môr i ymwelwyr gyda'r môr yn eich croesawu chi cyn gynted ag y byddwch yn camu y tu allan i'r drws ffrynt.
Os yw'n well gennych chi encil heddychlon ar lan y môr neu archwilio'n brysur, mae gan Borthcawl rywbeth i bawb - perl gudd o arfordir Cymru sy'n cynnig cyfuniad o fannau rhyfeddol o brydferth, bwytai arobryn, gweithgareddau gwefreiddiol ac awyrgylch cynnes, croesawgar, gan ei wneud yn gyrchfan perffaith ar gyfer dihangfa dros yr haf. Mae'r ardal yn adnabyddus am ei syrffio epig - ac os ydych chi'n awyddus i fentro i mewn i'r tonnau gyda help darparwyr gweithgareddau lleol, fe welwch chi Coney Surf ar Draeth Coney ac Ysgol Syrffio Porthcawl yng Nghanolfan Chwaraeon Dŵr Rest Bay.
Ffansi gweithgaredd llai anturus? Beth am fwynhau golygfeydd ysblennydd o Fôr Hafren wrth i chi gerdded ar hyd rhan Sir Pen-y-bont ar Ogwr o Lwybr Arfordir Cymru, gan ymweld â thirnodau fel y marina, y goleudy a Theatr hanesyddol Pafiliwn y Grand ar hyd y ffordd. Edrychwch ar y siopau annibynnol yng nghanol y dref, gyda siopau bwtîc, siopau anrhegion a bwyd a diod lleol a ffres ar gael. Pan fyddwch chi bron marw eisiau bwyd ar ôl yr holl archwilio - bydd digonedd o ddewis i chi am damaid i'w fwyta - os ydych chi ffansi pysgod a sglodion ar y traeth, byrbryd mewn caffi neu brofiad o'r radd flaenaf mewn bwyty!
Opsiynau llety i bawb...
Os ydych chi eisiau ymlacio neu fwynhau antur - Sir Pen-y-bont yw'r lle ar gyfer eich dihangfa dros yr haf! Gyda digwyddiadau gwych i ddod dros yr haf , dyma'r amser perffaith i drefnu eich arhosiad, pacio'ch bagiau a dod draw am wyliau bythgofiadwy yn Ne Cymru! Dilynwch ni ar y cyfryngau cymdeithasol am fwy o ysbrydoliaeth am bethau i'w gweld a'u gwneud, a llefydd i fwyta ac yfed!
.jpg)
