Yr haf yw'r amser perffaith i archwilio syrffio, copaon a golygfeydd Sir Pen-y-bont ar Ogwr - ac mae'n gyfle gwych i fwynhau digwyddiadau awyr agored gyda chefndir heulog, hardd! O wyliau unigryw i ddigwyddiadau chwaraeon hwyliog - dyma rai o'r prif ddigwyddiadau sy'n cael eu cynnal yn Sir Pen-y-bont yr haf yma na fyddwch chi eisiau eu colli!
Ogi Porthcawl 10K
Yn gyntaf mae ras 10K Ogi Porthcawl , sy'n cael ei chynnal ar ddydd Sul 2 Gorffennaf. Mae'r digwyddiad yma'n denu rhedwyr o bob rhan o'r DU a thu hwnt, gyda'r cyfranogwyr yn gwthio eu hunain i'r eithaf wrth iddyn nhw rasio drwy dref glan môr hyfryd Porthcawl. Os ydych chi'n rhedwr profiadol neu ddim ond eisiau herio'ch hun, mae 10K Porthcawl yn ffordd wych o brofi'ch gwytnwch wrth fwynhau'r golygfeydd arfordirol trawiadol. Mae'r llwybr yn cynnwys golygfeydd o draethau a baeau lleol, yn ogystal â harbwr Porthcawl, y goleudy a theatr hanesyddol Pafiliwn y Grand. Os ydych chi'n chwilio am hwyl i'r teulu, mae gan y digwyddiad rywbeth ar gyfer pob oedran - gyda Ras Hwyl, Ras i Blant Bach a ras gystadleuol Her y Dyfodol, gan roi cyfle i egin athletwyr roi cynnig ar ddechrau rhedeg. Hyd yn oed os nad ydych chi'n cymryd rhan, mae'r bwrlwm o gwmpas y dref a'r awyrgylch gwych yn denu gwylwyr o bell ac agos ar ddiwrnod y ras.
Eisiau mwynhau penwythnos actif? Mae digon o ffyrdd llawn adrenalin i chi dreulio eich amser yn Sir Pen-y-bont ar Ogwr - o syrffio ar yr arfordir i feicio mynydd yn y cymoedd, ac wrth gwrs mae gennym ni lawer o dirweddau naturiol y gallwch chi eu mwynhau wrth gerdded am filltiroedd!
Twrnamaint Golff Agored Hŷn
Ni fydd y rhai sy'n hoff iawn o golff eisiau colli'r Ornest Agored Hŷn sy'n cael ei chyflwyno gan Rolex, rhwng 27 a 30 Gorffennaf. Mae'r digwyddiad mawreddog yma'n denu rhai o enwau mwyaf y byd golff, gyda'r chwaraewyr yn herio'i gilydd ar lawntiau hardd Clwb Golff Brenhinol Porthcawl. Os ydych chi'n gefnogwr golff pybyr neu ddim ond eisiau mwynhau rhywfaint o gyffro ac egni'r digwyddiad yma o safon byd, mae'n gyfle gwych i fod yn rhan o unig Bencampwriaeth Fawr Hŷn Ewrop, yma yn Ne Cymru! Yn ogystal â gwerthfawrogi golff y bencampwriaeth - gall ymwelwyr fentro i ganol tref Porthcawl i fwynhau'r siopau bwtîc a'r siopau annibynnol, a chael blas ar fwyd lleol godidog y bwytai arobryn.
Tra rydych chi yma, ewch i archwilio'r darn yn Sir Pen-y-bont ar Ogwr o Lwybr Arfordir Cymru a mwynhau'r cefn gwlad gyda'r mannau gwyrdd helaeth a'r golygfeydd gwych sydd ar gael! Mewn tua hanner awr o yrru gallwch fynd o'r tonnau i'r copaon - gan fwynhau panorama Sir Pen-y-bont ar Ogwr o lecyn gwylio poblogaidd ar fynydd y Bwlch.
Rhwng Gŵyl y Coed
Digwyddiad arall y mae'n rhaid i chi ymweld ag o ar galendr Sir Pen-y-bont ar Ogwr yw Gŵyl Between the Trees, digwyddiad hyfryd ac unigryw sy'n cael ei gynnal dros benwythnos gŵyl y banc Awst (25ain i 27 Awst). Yn Between the Trees fe gewch chi ymdeimlad gwirioneddol o gymuned, gan eich croesawu chi gydag egni cadarnhaol i'r penwythnos yma sy'n addas iawn i deuluoedd. Yn dathlu cerddoriaeth a byd natur, mae'r ŵyl yn cynnig casgliad amrywiol o berfformwyr a gweithgareddau sydd wedi'u cynllunio i ysbrydoli, difyrru a chyflwyno ymwelwyr i harddwch yr awyr agored. Bydd cyfle i chi fwynhau perfformiadau byw o gerddoriaeth werin indie a chyfoes, gweithdai creadigol, gair llafar, dosbarthiadau ioga, teithiau cerdded tywys yn y goedwig a llawer mwy!
Gyda ffocws ar ymwybyddiaeth ofalgar, byd natur, gwyddoniaeth a'r celfyddydau creadigol ac wedi'i lleoli yng nghoedwig hudolus, hynafol Merthyr Mawr - mae Between the Trees yn cynnig encil llesol a naturiol cwbl unigryw! Mae tocynnau ar gael yma.
Cynlluniwch eich trip
Gyda chymaint yn digwydd, mae'r haf yn amser gwych i ymweld â Sir Pen-y-bont ar Ogwr a chreu atgofion am oes - os ydych chi'n chwilio am wefr, yn hoff o fyd natur, neu'n gefnogwr chwaraeon, rydych chi'n siŵr o ddod o hyd i rywbeth i'w fwynhau ymhlith y digwyddiadau haf gorau yma! Aros am sbel? Edrychwch ar yr opsiynau ar gyfer llety lleol yma.
O.N. Cofiwch ein tagio ni os ydych chi'n rhoi negeseuon am eich ymweliad ar gyfryngau cymdeithasol!
