Weithiau, y cyfan sydd arnoch chi ei angen yw newid bach a mynd i rywle newydd. Archwiliwch y gorau o Sir Pen-y-bont ar Ogwr ar droed. Rhowch gynnig ar un o'r tair o berlau cudd yma.
Rhowch gynnig ar Daith Gylch5 milltir Afon Ogwr a Merthyr Mawr. Bydd cyfle i archwilio'r gorau o Ben-y-bont ar Ogwr wrth i chi ddilyn rhuthr Afon Ogwr, gan fynd heibio pentref hardd Merthyr Mawr ar eich llwybr. Gan ddechrau yng Nghanol Tref Pen-y-bont ar Ogwr, beth am roi cychwyn i'r antur gyda brecwast blasus yn un o'r caffis sydd gan y dref i'w cynnig, neu ewch draw i'r farchnad dan do am deisennau cri i'w mwynhau ar eich taith. Cyn bo hir byddwch yn gadael y dref ar ôl cerdded drwy'r coed ynn a derw yng nghoetiroedd tawel Craig-y-Parcau, gan ddilyn Afon Ogwr tuag at Bentref a Thwyni Merthyr Mawr. Ychydig ymhellach ar hyd y llwybr mae'r Bont Drochi sy'n dyddio o'r 15fed ganrif, gyda thyllau yn y parapet fel bod ffermwyr yn gallu gwthio eu defaid amharod i'r afon ar gyfer eu dipio yn flynyddol. Gan ddilyn llwybr glan yr afon, byddwch yn mynd drwy bentref hardd gyda bythynnod to gwellt tlws tuag at adfeilion atmosfferig Castell Ogwr.
Codwch allan fis Ionawr eleni i fwynhau'r coetiroedd bendigedig pan fyddwch yn cerdded taith gylch 2.5 milltir Nant Bryn Glas sy'n dechrau ym mhentref Llangrallo, cartref i eglwys Sant Crallo sy'n dyddio o'r 13eg ganrif, a mwynhau'r castell Normanaidd yng Nghoety. Er mai pentref bach ydyw, mae gan Langrallo ddigon o opsiynau ar gyfer cinio haeddiannol ar ôl cerdded, neu beint o flaen tanllwyth o dân. Beth am aros am sbel a threulio noson neu ddwy yng Ngwesty hyfryd Coed y Mwstwr sydd wedi'i leoli mewn coetir deiliog.
Ewch ar daith o amgylch Cymoedd gwych Cymru wrth i chi gerdded neu feicio Llwybr Cwm Ogwr sy'n ymestyn o Abercynffig i Nant-y-Moel. Mae'r llwybr cyfan yn wastad a does dim traffig! Mae pentref Blackmill hanner ffordd ar hyd y llwybr gyda dwy dafarn, siop bentref a Bistro Smoke Pit os ydych chi eisiau tamaid o fwyd. Cadwch lygad am y paneli gwybodaeth treftadaeth a sganiwch y codau QR i gael mynediad i Lwybr Sain Treftadaeth Cwm Ogwr i glywed straeon gwych am orffennol y Cwm. A cherddwch y ddolen 2 km ar hen safle Golchfeydd Ogwr gyda llwybrau, meinciau a gwaith celf newydd.
