Paratowch ar gyfer haf epig yn Sir Pen-y-bont ar Ogwr wrth i'r tywydd cynhesach ddod â digwyddiadau awyr agored anhygoel! O theatr awyr agored i wyliau cerddorol unigryw a digwyddiadau chwaraeon, mae rhywbeth i bawb ei fwynhau wrth fwynhau'r heulwen braf!
Plymio i benwythnos o berfformiadau cyffrous gyda Seascape: 1af ac 2il Mehefin
Mae gŵyl celfyddydau awyr agored a cherddoriaeth fyw am ddim yn dod i Borthcawl yn fuan iawn! Bydd perfformwyr talentog yn arddangos eu sgiliau mewn arddangosfa syfrdanol o gerddoriaeth, dawns a theatr yn erbyn cefndir glan môr syfrdanol. Bydd gwledd i'r llygaid gyda digonedd o adloniant ar draws gwahanol leoliadau o amgylch tref Porthcawl a glan y môr. Fe welwch chi forfil 18 troedfedd hyd yn oed yn natblygiad Cosy Corner ar ddydd Sul 2il Mehefin! Edrychwch ar amserlen lawn y digwyddiad yma.
Paratowch ar gyfer penwythnos llawn cyffro wrth i BeachFest ac RescueFest gyrraedd ein glannau ni: 15 ac 16 Mehefin
Un o'r digwyddiadau y mae disgwyl mawr iawn amdano yr haf yma i bawb sy'n hoff o'r traeth - mae BeachFest ym Mhorthcawl yn addo penwythnos llawn cyffro o chwaraeon gwych, anturiaethau glan môr, adloniant a hwyl i'r teulu. Gyda digwyddiad poblogaidd RescueFest yr RNLI yn dychwelyd yr un penwythnos, gan gynnal arddangosfeydd cyfareddol gan ein gwasanaethau brys ar ddydd Sul 16eg Mehefin, mae'n benwythnos llawn ffyrdd cyffrous o greu atgofion bythgofiadwy ger glan y môr!
Dychmygwch fwynhau'r awyrgylch bywiog gyda cherddoriaeth, adloniant, stondinau ac arddangosfeydd yn Cosy Corner, tra mae timau chwaraeon o bob rhan o'r DU yn cymryd rhan mewn cystadlaethau llawn adrenalin ym Mae Sandy, a'r draethlin yn fwrlwm o weithgareddau cychod! Ymunwch â'n tudalen ar gyfer y digwyddiad ar Facebook am ddiweddariadau a mwy o wybodaeth.
Rhedeg i mewn i'r haf gyda 10K llawn golygfeydd Porthcawl: 7fed Gorffennaf
Gwisgwch eich esgidiau rhedeg ar gyfer 10K Porthcawl, ras olygfaol ar hyd arfordir godidog Sir Pen-y-bont ar Ogwr, wedi'i threfnu gan Run4Wales. Os ydych chi'n rhedwr profiadol neu'n dechrau arni, mae 10K Porthcawl yn cynnig cyfle i brofi harddwch y rhanbarth wrth ymgymryd â her gyffrous!
Gall y teulu cyfan gymryd rhan ar ddiwrnod y ras - gyda Ras Hwyl, Ras Wib i Blant Bach a ras gystadleuol Herwyr y Dyfodol, gan roi cyfle i egin athletwyr gymryd eu camau cyntaf yn y byd rhedeg. Peidiwch â cholli'r cyfle - archebwch eich lle yma.
Cyfle i ddarganfod y gorau o fywyd gwledig gyda Sioe Wledig Pen-y-bont ar Ogwr: 13 ac 14 Gorffennaf
Mentrwch i gefn gwlad hardd Pen-y-bont ar Ogwr wrth i chi fwynhau dathliad o amaethyddiaeth, crefftau ac ysbryd cymunedol lleol yn Sioe Wledig Pen-y-bont ar Ogwr. O sioeau ceffylau gwefreiddiol i anifeiliaid fferm hoffus a hen dractorau - mae'n argoeli i fod yn benwythnos gwych o hwyl teuluol traddodiadol. Cyfle i wledda ar ddanteithion blasus o siopau bwyd, pori ar hyd stondinau crefft hyfryd, a mwynhau'r awyrgylch cyfeillgar wrth i chi ymgolli yn y bywyd gwledig.
Cyfle i herio llwybrau rhedeg epig gyda Ras Cwningod Merthyr Mawr: Gorffennaf 20fed
Perl arall ar galendr digwyddiadau chwaraeon De Cymru - Mae'r Ras Cwningod yn llwybr heriol 12K drwy Stad hardd Merthyr Mawr. Cyfle i fwynhau bryniau, twyni a glannau afonydd yr ardal syfrdanol yma, gan gynnwys dod i lawr twyn tywod y Big Dipper, a'r gred ydi mai dyma'r twyn tywod uchaf yng Nghymru.
Mae ras hwyl yn cychwyn prynhawn cyfan o ddathliadau am 3pm cyn i'r Ras Cwningod ddechrau am 4pm - ac mae pencampwriaeth milltir cwrw yn nes ymlaen gyda'r nos hyd yn oed!
Camwch i fyd hudol o gerddoriaeth a natur yng Ngŵyl Rhwng y Coed: 22ain - 25ain Awst
I gael profiad hudol yng nghanol byd natur, edrychwch ar yr Ŵyl Between the Trees, digwyddiad cerddoriaeth, celfyddydau a natur unigryw wedi'i leoli mewn coetir hyfryd yng Nghymru. Cyfle i ymgolli mewn byd o gerddoriaeth fyw, gweithdai a gweithgareddau sy'n dathlu harddwch yr awyr agored a'r ysbryd creadigol sy'n ffynnu yn y lleoliad hudolus hwn.
Yn cael ei gynnal dros benwythnos gŵyl y banc, mae Between the Trees yn cynnig cyfle i ailgysylltu â byd natur drwy gerddoriaeth werin indie, celf a gair llafar, o dan ganopi coedwig Coed Candleston yng Ngwarchodfa Natur Genedlaethol Merthyr Mawr. Peidiwch â cholli'r cyfle unigryw yma - archebwch eich tocynnau yma!
Mae eich antur haf yn dechrau yma...
Gyda chymaint o ddigwyddiadau cyffrous i edrych ymlaen atyn nhw, mae'r haf yn Sir Pen-y-bont ar Ogwr yn gyfnod o lawenydd, darganfod a dathlu. Os ydych chi'n hoffi mynd i wyliau, yn frwd dros chwaraeon, yn hoff o fyd natur, neu'n awyddus i fwynhau diwylliant bywiog y rhanbarth, mae rhywbeth i bawb ei fwynhau yn y gornel amrywiol a deinamig yma o Gymru. Meddwl aros am sbel? Edrychwch ar yr opsiynau llety yma.